Notación nas damas anglo-americanas

O lector xa debeu decatarse de que  desde hai unhas semanas aumentamos o número de enlaces nos que se poden ler ou mesmo baixar libros de damas anglo-americanas. Coñecidas como "checkers" en Estados Unidos ou "draughts" en Gran Bretaña" tamén se xogan de forma federada en Irlanda, Canadá, Australia, Nova Zelandia, Alemaña, Dinamarca e Italia. O campionato mundial da modalidade [con aperturas sorteadas a 3 lances], que se disputa cada 4 anos, está en poder do gran mestre ruso-americano Alexander Moiseyev que en agosto do 2011, revalidou o seu título derrotando nun match celebrado en Cleveland ao temible aspirante italiano Michele Borghetti polo resultado de 7 xogos gañados, 6 perdidos e 26 empates.  Os dous eventos máis importantes son o Torneo Americano e o Torneo Británico nos que poden participar xogadores de calquera nacionalidade. De forma alternada, os gañadores adquiren o dereito de xogar polo título mundial contra o vixente campión. Con similar sistema tamén se disputan os títulos "GAYP" [Go As You Please], denominación pola que se coñecen os eventos con apertura libre.

Aínda que varía o regulamento con respecto ás damas clásicas a estratexía de xogo é moi similar en ambas as dúas versións. Os libros da literatura damista en lingua inglesa son unha axuda moi interesante para os estudosos das damas clásicas. A maior parte das aperturas constrúense de xeito idéntico e incluso moitos xogos coinciden de forma completa como se pode apreciar lendo este blog, onde presentamos infinidade de exemplos.

Os peóns moven do mesmo xeito que nas damas clásicas. A diferenza máis notable está no movemento das damas, que na versión anglo-americana só se desprazan unha casiña para adiante ou para atrás. Tampouco contemplan as leis da cantidade e da calidade, polo que en caso de múltiples capturas poden elixir a que máis lle interese. Descartando os finais de damas e algunha que outra apertura onde se presente a mencionada alternativa para comer, os xogos de "checkers" ou "draughts" deben ser perfectamente válidos nas damas clásicas e viceversa.

Para poder estudar estes libros, o lector aínda debe saber algo moi importante:

•  O taboleiro [de cor verde e amarelo] colócase de xeito inverso, co cadro escuro na esquerda.
•  A saída correspondelle ás negras [ou vermellas no actual regulamento].
•  A numeración das casiñas é diferente tal como se pode apreciar no seguinte diagrama:

Numeración do taboleiro de "Draughts" ou "Checkers"

Para poder reproducir os xogos directamente sen o inconveniente de ter que colocar o noso taboleiro ao revés, o mellor truco é numeralo do seguinte xeito:

 Taboleiro de damas clásicas coa numeación das "Draughts" ou "Checkers".

Agora xa só resta explicalo cun exemplo:

Notación de "Draughts" ou "Checkers"

* * *

Notación de "Damas Clásicas"

Michele Borghetti vs. Alex Moiseyev

Match polo Campionato do Mundo 2011, Cleveland

Xogo Nº 1

1.12-15, 23-19; 2.10-13 ...

Estes son os 3 lances que deparou o sorteo. Unha variante da «Partida Paralela Ortodoxa» que en apertura libre e máis habitual formar comezando con 1.10-13.

2. ... 19x12; 3.08x15, 21-18;  4.05-10 …

Unha liña introducida por Víctor Oliveira e agora bastante utilizada nos torneos portugueses.

4. …  27-23;

Tanto a textual como 4. … 28-23; son as xogadas con máis preferencias.

5.10-14, 23-19; 6. 14x23, 28x12;  7.07x16, 25-21;

POSICIÓN DESPOIS DE 7. ... 25-21

Ata aquí todo moi coñecido, mais nesta altura 7. … 32-28 é a alternativa habitual.

8.13-17, 29-25;

Nun xogo José Luis Guerra vs. Vaz Vieira do 27º Campionato de Portugal, as negras seguiron con 8. … 22-19. Tamén se ten xogado 8. … 31-28.

9.01-05 …

Mellor  parece  mover primeiro 9.11-15 para manter o control da casa central de «19».

9. … 30-27;

Máis forte é 9. … 22-19 ocupando esta importante casiña.

10.11-14 …

As brancas impiden o movemento do peón «22» e ao mesmo tempo eliminan un posible corte con 18-13. Pero 10.11-15 directamente era tan boa.

10. … 18x11;  11.06x15,  21-18;

As negras insisten en preparar o corte, pero en damas clásicas era mellor 11. … 27-23.

12.05-10 …

Na nosa modalidade dispoñían da «xudía» con 12.09-13, 18x09; 13.17-21, 26x17; 14.02-06, 09x02; 15.06-10, 02x20; 16.16x30 con gran superioridade,  aínda que quizás as negras poidan salvarse.

12. … 18-13; 13.09x18, 22x06;  14.02x11, 32-28;  15.11-14 …

Interesante era 15.15-19.

15. …  28-23;  16.03-06 …

Con idea de replicar a 16. … 27-22; con 17.06-10  alcanzando unha moi forte posición.

POSICIÓN DESPOIS DE 16.03-06 

16. … 23-20!!; 

Pero Moiseyev  pon fin á loita cun artístico empate.

17.16x30  [EMP.]

En ambas as dúas modalidades seguiría 17. … 31-28: 18.30x21, 25x02 con xogo nulo.